Најголемата батерија во Европа официјално е ставена во функција, поврзувајќи на мрежата систем кој може да складира доволно електрична енергија за да напојува 300.000 домови до два часа.
Овој објект, кој се наоѓа во Котингем, Велика Британија, е изграден од Harmony Energy Limited и користи технологија на Tesla.
Овој објект не е една голема батерија, туку систем на уреди на Tesla Megapack, кој со својот вкупен капацитет може да складира до 196 MWh електрична енергија во еден циклус, обезбедувајќи услуги за балансирање на мрежата и во исто време овозможувајќи изворите на фосилни горива да се заменат со обновливи извори како соларни фарми и турбини на ветер.
Секој Tesla Megapack може да складира преку 3 MWh енергија, што е доволно за напојување на 3.600 домови за еден час. Harmony Energy Limited не прецизираше колку од овие уреди користела во изградбата, но врз основа на придружната фотографија во соопштението за медиумите, на локацијата има најмалку неколку десетици единици.
Harmony Energy Limited велат дека проектот првично беше планиран да профункционира во две фази - во декември 2022 и март 2023 година - но поради предизвикувачкиот зимски период, тие одлучија уште сега да го приклучат целиот систем на мрежа. Компанијата наведува дека во наредните години ќе отвори уште шест вакви погони.
Минатиот месец, Канцеларијата за пазарот на гас и електрична енергија соопшти дека Велика Британија може да доживее недостиг на гас оваа зима поради конфликтот во Украина. Гасот е одговорен за производство на помеѓу 40 и 60 проценти од електричната енергија во ОК, а недостигот може да има големо влијание врз производството.