Многу љубители на мусаката би сакале да научат како да направат грчка мусака. По тој повод ви пренесуваме оригинален рецепт.
Мусаката е познато балканско јадење за кое постои погрешно верување дека е грчко јадење. Всушност мусаката е јадење од Блискиот Исток кое на Балканот го носат Османлиите и до ден денес го задржало оригиналното арапско име мусака (مصقعة, muṣaqqa‘a). На Балканот има неколку варијанти и тоа албанска, македонска, српска, романска, бугарска и се разбира грчка. Токму грчката многумина ја сметаат за највкусна.
Грчката мусака е на врвот на листата на омилени јадења на туристите, но е и јадење број еден за самите Грци. А, можеби секое грчко семејство има некој свој таен зачин, но можете да го подготвите и на традиционалниот грчки начин.
Потребни состојки:
- 3 модри патлиџани (средна големина)
- 3 компири
- 1 голем кромид
- 2 чешниња лук
- 700 гр мелено говедско месо
- 3 лажици маслиново масло
- 2 лажици доматна паста
- 260 гр сос од домати
- 1 чаша (240 мл) говедска супа или ½ чаша (120 млк) црвено вино
- 1 ловоров лист
- 1 лажичка сол
- ½ лажичка бибер
- ½ лажичка цимет
- 1 лажичка мајчина душица
- 1 л млеко
- 120 гр путер
- 120 гр брашно
- 85 гр пармезан
- ½ лажичка морско оревче
- 2 жолчки
- растително масло за пржење
Подготовка:
1. Подгответе го зеленчукот: модрите патлиџани исечете ги на парчиња со дебелина од 1 см. Посолете ги и оставете ги 30 минути. Во меѓувреме излупете ги компирите и исечете ги.
2. Модрите патлиџани добро измијте ги и исушете ги. Пржете ги модрите патлиџани и компирите додека не поруменат. Префрлете ги на хартиена крпа за да се ослободите од вишокот масло. Има и полесна варијанта: ставете ги модрите патлиџани и компирите во тавче, намачкајте ги со маслиново масло и печете додека не поруменат.
3. Подгответе ја смесата со месо: загрејте го маслиновото масло во голема тава на средна температура. Додадете го сечканиот кромид и динстајте 3-4 минути. Додадете толчен лук и динстајте уште 2-3 минути.
4. Додадете го месото и пржете со мешање додека месото не е повеќе розово. Потоа додадете сол, бибер, цимет и мајчина душица, добро измешајте. Додадете доматна паста и ловоров лист и добро измешајте. Додадете ја говедската супа, измешајте и нека почне да врие. Намалете ја томпературата на минимум и варете додека не се згусне. Тргнете од оган и оставете на страна.
5. Подгответе бешамел сос. Загрејте 1 литар млеко. Растопете го путерот во тава на тивок оган, кога путерот ќе се растопи, додадете го брашно и матете непрекинато додека не добиете мазна паста. Постепено додавајте го топлото млеко со постојано матење за да не се формираат грутки. Матете додека сосот не стане мазен и густ. Тргнете го од оган и додадете малку сол, бибер, морско оревче, пармезан и жолчка, изматете додека не се изедначи.
6. Загрејте ја рерната на 180°C.
7. Составете ја мусаката: во смесата со месо додадете 4-5 лажици бешамел сос и измешајте. Наредете ги компирите во сад за печење 33х22 см, па ставете половина од модар патлиџан. Истурете ја смесата со месо и рамномерно распоредете. Наредете ги преостанатите модри патлиџани и прелијте ги со бешамел сосот. Одозгора изрендајте пармезан.
8. Печете 40-50 минути, или додека не порумени. Извадете ја мусаката од рерна и оставете ја да се излади најмалку 45 минути пред да ја исечете.
