Македонскиот фудбал доби уште двајца претставници во најелитното европско клупско натпреварување откако хрвстски Динамо синоќа успешно ја мина последната пречка и се пласираше во фазата по групи.
Капитенот Аријан Адеми и неговиот соиграч Стефан Ристовски синоќа беа стартери за Динамо на „Максимир“ против норвешкиот шампион Боде-Глимт кој во Загреб допатува со минимална предност од 1:0.
Најпрво Мислав Оршиќ во 4. минута ја затресе мрежата на Норвежаните, а во 35-тата минута често критикуваниот Бруно Петковиќ го постигна можеби голот на својата кариера. Нашиот Ристовски нафрли во шеснаесетникот, Петковиќ ја прими топката, а потоа со прекрасен удар со ножички погоди за 2:0. Во меѓувреме Адеми со одличен удар ја погоди пречката.
Потоа Норвежаните ја презедоа иницијативата, доминираа и заслужено намалија на 2:1 во 80. минута преку Алберт Гробек.
Бидејќи вкупниот резултат гласеше 2:2, а УЕФА го исфрли правлото за гол на гости, натпреварот замина во продолженија. Таму беше нерешено речиси до крајот. Кога се очекуваше да се шутираат пенали, Јосип Дрмиќ погоди за 3:1 во 117. минута, а Петар Бочкај во 120-тата ја запечати големата победа на Динамо со конечни 4:1.
Така, Адеми и Ристовски му се придружија на Елиф Елмас кој со својот Наполи има директен пласман во групната фаза.
Енис Барди во својот трет натпревар за Трабзонспор, каде се пресели летово, биеше битка за своето прво учество во Лигата на шампиони. Тренерот Абдулах Авџ' му ја додели улогата на треквартиста во стартните 11 против данскиот шампион Копенхаген, а Барди беше еден од најактивните на теренот. Данците имаа предност од 2:1 од првиот натпревар, а и покрај големата инцијатива на турскиот тим натпреварот заврши без голови. Тоа значи дека Копенхаген оди во Лигата на шампионите, додека Барди и Трабзонспор ќе мора да се задоволат со настап во Лига Европа.
Синоќа голем успех оствари и шкотски Ренџерс кој на гости славеше кај ПСВ среде Ајндховен со 1:0 со голот на Антонио Чолак во 60-тата минута. Првиот натпревар во Глазгов заврши 2:2, па Шкотланѓаните после цели 11 години повторно се во групната фаза,
Жрепката за групната фаза ќе се одржи денес од 18 часот во Истанбул. Наполи и Елмас се во третиот барабан, додека Динамо со Адеми и Ристовски во четвртиот.