Стефан Ристовски објави дека по враќањето од репрезентативните обврски излегол позитивен на тестирањето на новиот коронавирус. Со оглед на тоа што беше дел од трите натпревари, дали на повидок е голем кластер во македонската репрезентација?
Десниот бек Стефан Ристовски на својот Instagram профил ја извести јавноста дека е позитвен на COVID-19 и заедно со сопругата и синот се во карантин во нивниот дом во Лисабон.
На сторито тој објави фамилијарна фотка на која напиша: „Ковид позитивна фамилија... Ќе се бориме и ќе се вратиме посилни! Останете здрави и безбедни“.
Многу веројатно е дека Ристовски короната ја закачил додека беше со репрезентацијата. Тој настапи на трите натпревари: баражот со Грузија на гости и двата натпревара од Лигата на нации, дома со Естонија и со Ерменија на неутрален терен на Кипар.
Како што дознава Кајгана, во Фудбалската федерација на Македонија веќе има мал кластер. Веројатно допрва ќе излегуваат уште позитивни фудбалери кои беа дел од настапите меѓу кои и историскиот со Грузија кога за прв пат се пласиравме на Европско првенство.
Карантинот на Ристовски нема да му наштети во однос на настапите во неговиот клуб Спортинг бидејќи тој е ставен во немилост на тренерот. Клубот сакаше летово да го продаде, но Ристовски не прифати трансфер во Русија и за казна беше исфрлен од првиот тим. Многу веројатно е дека зимава ќе се пресели во друг клуб, бидејќи со неиграње цела година нема да биде подготвен за настап на ЕУРО.
