Легендарниот тенисер Роџер Федерер и официјално стави крај на својата богата кариера во која стана симбол на „белиот спорт“. Славниот Швајцарец на социјалните мрежи потврди дека следната недела ќе го игра својот последен турнир.
Федерер (41) во изминативе години имаше многу проблеми со повреди, што резултираше со негово отсуство на бројни турнири. Зад него е тешкото опоравување од четвртата повреда на коленото, која воедно му беше и последна во кариерата. Швајцарецот одлучи дека не може повеќе да го прави тоа.
Дека ќе ја заврши кариерата можеше да се насети во претходните месеци бидејќи неколку пати откажуваше враќање на турнири. Сега е официјално, односно потврдено на официјалната веб-страница.
Федерер ќе игра на Лејвер купот во Лондон и тоа ќе биде негов проштален турнир. Турнирот ќе се игра од 23 до 25 септември, кога љубителите на тенисот за последен пат ќе уживаат во магијата на големиот тениски херој.
Федерер на своите профили објави писмо упатено до фановите во кое ја објаснува својата одлука да стави крај на кариерата.
„Денес сакам да споделам новости со вас. Како што сите знаете, последните три години ми донесоа предизвици од повреди до операции. Работев напорно за да се вратам во натпреварувачка форма. Сепак, ги знам мојот капацитет и физичките граници и последната ми беше јасен сигнал. Имам 41 година и одиграв повеќе од 1.500 натпревари во мојата 24-годишна кариера. Лејвер купот следната недела во Лондон ќе биде мојот последен АТП турнир. Во иднина ќе играм тенис, но не на Грен слем турнирите и на АТП“, рече Федерер.
Вака се заокружува приказната за тенисерот кој многумина го сметаат за најдобар на сите времиња. Тоа е заминување на херојот на многу генерации кој освои 103 АТП титули вклучувајќи 20 Грен слем титули.
Без разлика што не ја завршува кариерата како човек со најмногу Грен слем титули во историјата, неговата елеганција, грациозност и невиден стил на играње тенис го ставаат на самиот врв.
Повредата на коленото не беше нешто што Швајцарецот можеше да го надмине, а последниот меч го одигра на Вимблдон во 2021 година.
