Црната кутија на рускиот воен авион кој се сруши во Црното море е пронајдена, објави BBC. Руската агенција TASS објави дека полицијата ја пронашла црната кутија на воениот авион во кој настрадаа 92 патници и членови на екипажот.
„Уредот за снимање на податоците за летот е изваден од водата. Авионот со црната кутија наскоро ќе тргне кон Москва, а експертите од Министерството за одбрана треба да го почнат процесот на дешифрирање на податоците“ - велат руските извори.
Црната кутија е пронајдена на околу 1,6 километри од брегот, на длабочина од 17 метри.
Според првичните сознанија, капетанот на рускиот авион Tu-154, се обидел да го слета авионот во Црното море, но за жал не успеал во тоа.
Деловите од авионот се расфрлани по морското дно во радиус од 500 метри, а нуркачите ќе мораат да го пронајдат и контролниот механизам од авионот.
Руската Федерална служба за безбедност (ФСБ) соопшти дека истрагата за падот на патничкиот авион оди во четири правци, но дека нема докази за терористички напад или саботажа.
„Четирите главни верзии се дека авионот бил погоден од некаков објект, дека неквалитетното гориво предизвикално губење на притисокот и на крајот прекинување на работата на моторите, дека пилотот направил некаква грешка или пак дека авионот имал некаков технички проблем“ - вели ФСБ во соопштението.
