Украинската нуклеарна централа Запорожје, најголемата нуклеарна централа во Европа, денеска била гранатирана, јави руската државна новинска агенција ТАСС.
Се додава дека гранатите биле испукани од Украина и паднале во близина на сув магацин и оти не се откриени радиоактивни емисии.
Ренат Карча, советник во рускиот оператор за нуклеарна енергија Росенергоатом, изјави дека 15 гранати биле испукани врз објектите на централата.
Меѓународната агенција за атомска енергија (МААЕ) потврди дека „силни експлозии синоќа и денес ја потресоа областа на нуклеарната централа Запорожје“.
– Експертите на МААЕ во Запорожје известуваат за десетина и повеќе експлозии од очигледно гранатирање и оштетени се некои згради, системи и опрема на локацијата, но ниту една досега не е критична за нуклеарната безбедност и сигурност, соопшти МААЕ.
Директорот на МААЕ Рафаел Гроси повика гранатирањето веднаш да престане.
– Кој и да стои зад ова, мора веднаш да престане. Како што реков многу пати досега, си играте со оган!, нагласи Гроси.
Тој го повтори својот апел до двете страни во конфликтот да се договорат и што е можно поскоро да создадат зона за нуклеарна безбедност и сигурност околу Запорожје. Во последните месеци тој се вклучи во интензивни консултации со Украина и Русија за формирање на таква зона, но засега нема договор.