Рускиот новинар Нобел Арустамјан остана без акредитација за Европското фудбалско првенство поради повеќекратни посети на Нагорно-Карабах, ерменска енклава на територијата на Азербејџан, која е под контрола на Ерменија и населена со мнозинство Ерменци.
Арустамјан, кој е од ерменско потекло, а известува за руската телевизија Матч ТВ, објави дека не добил акредитација за следење на ЕУРО 2020 кое заеднички го организираат 11 европски градови, вклучувајќи ја и азербејџанската престолнина Баку.
За акредитација на новинарите на ЕУРО 2020 е потребна согласност од сите 11 национални фудбалски федерации.
Потпретседателот на Фудбалската федерација на Азербејџан, Елкан Мамадов, потврди дека неговата земја стои зад блокадата.
– Ова лице повеќе пати ги посетило окупираните територии. Тој човек ги прекршил законите на нашата држава, покажувајќи непочитување кон територијалниот интегритет на Азербејџан, изјави Мамадов за локалните медиуми.
Одбивањето да му биде издадена акредитација на Арустамјан предизвика гнев кај неговите руски колеги и матичната куќа.
Портпаролката на руската дипломатија, Марија Захарова, истакна дека „нејзините служби работеле цела ноќ“ со УЕФА во обид да му биде овозможено на Арустамјан „да ги извршува своите професионални обврски“, воздржувајќи се, притоа, од критики кон Азербејџан со кој Русија одржува добри односи.
– Верувам дека ќе се најде решение, порача портпаролката на руското Министерство за надворешни работи.