Мохамед Салах стана најдобар стрелец на Ливерпул на сите времиња во Премиер лигата, откако постигна два гола во победата над Манчестер Јунајтед со 7:0 и стигна до својот 129-ти гол за тимот од Енфилд во ова натпреварување.
30-годишниот Египќанец го собори рекордот на легендарниот Роби Фаулер, кој во кариерата постигна 128 гола во Премиер лигата, а претходно ги надмина Стивен Џерард (120) и Мајкл Овен (118).
Иако се мачи оваа сезона и не е на исто ниво како минатите години, Салах одигра одличен меч против лутиот ривал Манчестер Јунајтед и со два гола им помогна на соиграчите да стигнат до победа која може комплетно да им ја сврти сезоната, но кога го постигна вториот, со кој го собори и рекордот, го соблече дресот, ги покажа мускулите и колку му значи тој успех.
„Ова е многу посебен и важен момент за мене и не можам да лажам, ова ми беше на ум откако дојдов во Ливерпул. По првата сезона секогаш размислував за него и затоа е неверојатно што го соборив денес против Манчестер Јунајтед и тоа во натпревар кој заврши со овој резултат“, изјави Салах.
Салах дојде од Рома во 2017 година, а веќе постигна 32 гола во првата сезона во Премиер лигата. Следната година постигна 22 гола, а потоа во сезоната 2019/2020 постигна 19 гола. После тоа во следните две сезони постигна 22 и 23 гола, додека во оваа има 11 првенствени голови.
Ливерпул со вчерашната победа се врати во борбата за местата кои водат во Лигата на шампионите следната сезона, а тренерот Јирген Клоп истакна дека оваа победа ќе им покаже на ривалите на Ливерпул дека не треба така лесно да ги отпишуваат.