Стратегот на клупата на Јувентус гледа опасност во Наполи против кого неговиот тим вечерва ќе води борба за трофејот во италијанскиот куп.
„Победувањето никогаш не треба да се земе здраво за готово. Ќе биде важно да победиме заради играчите, за клубот и за навивачите. Работевме напорно за да дојдеме до натпревари како овој, така да сега е моментот да дадеме сѐ што можеме“, вели Маурицио Сари.
Јувентус во петокот го елиминираше Милан, па Сари во саботата имаше можност на мира да го следи дуелот на Наполи и Интер и да го анализира можниот противник.
„Против Интер видов еден тим кој од почеток пробуваше да игра висок пресинг, потоа, не знам дали поради причини поврзани со кондицијата или резултатот, се повлекоа. Ќе видиме каков пристап ќе имаат со нас, но сигурно е дека се тежок тим за спротивставување бидејќи кога ќе се затворат се цврсти, знаат да дриблаат и кога тргаат во напад се многу опасни“, смета Сари.
Она што ги интрресира навивачите на „Старата дама“ е тоа како ќе изгледа нападот на тимот кој најчесто е составен од тројца играчи кои досега Сари не секогаш ги поставуваше на исти позиции.
„Ќе видиме дали како центарфор ќе игра Дибала или Роналдо. Кој и да почне, не значи дека таа одлука ќе важи во текот на целиот натпревар. Кристијано против Милан одигра одлично од квантитавна гледна точка, беше доста активен дури и во дефанзивата“.
Натпреварот почнува вечер во 21 часот на „Олимпико“ во Рим.