Метеоролозите најавуваат ново невреме во попладневните часови во скопскиот регион, но не се знае дали ќе биде со катастрофални последици како вчерашното невреме во кое неофицијално загинаа 20 лица.
Директорот на Управата за хидрометеоролошки работи, Оливер Ромевски учествуваше на Управувачкиот комитет за справување со кризи и рече дека не очекувале невреме од вакви размери.
„Се случи феномен, во овој момент сум многу потрсен. Додека дуваше ветер со 70 км/час, атмосферската маса застана и почна да истуира една т.н. „водена бомба“. На Зајчев рид беа измерени 94 литри/м2, а на Петровец само пет л/м2. Природата си го направи своето“, изјави Ромевски.
И денес нашето подрачје ќе биде под влијание на влажна и нестабилна воздушна маса од Медитеранот, која попладне и во вечерите часови ќе предизвика променливо и нестабилно време со врнежи од дожд кој локален ќе бидат поројни и проследени со грмежи. Најпрво ќе бидат зафатени западните делови, а потоа кон крајот на денот и во вечерните часови ќе се прошират и во централните и североисточните делови. Процесите се очекува да бидат поинтензивни локално во форма на невреме со интензивен пороен дожд, особено во западните делови. Ќе дува повремено и умерен до засилен ветер.
Во Скопската котлина времето ќе биде променливо, а попладне нестабилно со врнежи од дожд кои локално ќе бидат поројни и со грмежи. Врнежите се очекува да бидат поинтензивни кон крајот на денот и во вечерните часови. Дневната температура ќе достигне до 29 степени.
Во случај на појава на електрични празнења се препорачува поголема внимателност, да не се престојува на отворен простор и под осамени дрвја.
