Сите веќе ја знаат приказната како Лионел Меси го потпишал својот прв договор со Барселона, а скапоцената салфетка потпишана од 12-годишниот Лео сега ќе се најде на аукција.
Тренерите Жузеп Мариа Мингеља и Карлес Решак седеле во ресторан со агентот Хорасио Гаџоли и потоа бил постигнат договор според кој Барселона се обврзала да исполни голем број услови на семејството Меси, а Лионел да дојде во Барселона.
Имал 12 години, а датумот на потпишаниот договор на салфетката е 14 декември 2000 година.
Барселона се обиде да преговара салфетката да се најде во нејзиниот музеј, но договорите меѓу клубот и агентот пропаднаа и тој сега овој скапоцен предмет го става на аукција.
Со продажбата ќе се занимава британската аукциска куќа Bonhams, а се очекува понудата за салфетката со потписот на Меси да биде околу 350.000 евра. Исто така, сите се убедени дека во понудата ќе биде вклучена и Барселона.
„Ова е еден од највозбудливите предмети што некогаш сум ги држел во рака. Тоа е обична салфетка, но е толку позната. Ова го означи почетокот на кариерата на Лионел Меси. Таа му го промени животот, а влијаеше на создавање на некои од највеличествените моменти за милијарди фудбалски фанови“, изјави во оваа прилика Јан Елинг од Bonhams.
