Иако сме 2022 година, жените уште се соочуваат со стегите на некои застарени општествени норми кога станува збор за врските и сексот.
Една од нив е „правилото“ дека треба да се чека најмалку три состаноци пред да имате секс со потенцијалниот партнер.
Стигмата околу сексот на првиот состанок оди до таму што уште има мислења дека ако жената го направи тоа, мажот „нема да ја сфати сериозно“, „ќе смета дека е лесна“ и „нема да ја има предвид за партнерка долгорочно“. Друго „античко правило“ е дека жената треба да почека и да го остави мажот „да се помачи“ додека ја добие „наградата“.
Овој лажен пуританизам освен што е мизогин во својата основа, претставува потиснување на женската сексуалност и слобода на изразување.
За жал, жените денес уште се „покажани со прст“, а мажите се пофалени како „освојувачи“.
Психолозите велат дека повеќето луѓе не би имале секс на првиот состанок не бидејќи не сакаат, туку поради стравот од општествената стигма за тоа што е „прифатливо“.
Ако размислувате дали да имате секс со некого на првиот состанок, единственото нешто за кое треба да се прашувате е дали сакате. Нема „точен“ одговор.
Секс терапевтите ја прошируваат темата понатаму.
Ако чувствувате хемија и двајцата се согласни да имате секс, баталете што мислат сите други. Ако со време истражите дали сте сексуално компатибилни тоа може да ви помогне да одлучите дали да инвестирате време и енергија во оваа личност.
Нема јасно дефинирани правила – сѐ се сведува на тоа кое е вашето ниво на удобност и што барате во моментот. Секако, искрената комуникација од првиот ден ќе ве однесе далеку ако оваа личност се покаже дека е „вистинската“.
Од женски аспект, ако имате секс на првиот состанок, тоа не ве прави помалку „квалификувана“ за сериозна девојка. Искрениот разговор ќе ви покаже уште пред да го направите тоа дали сте со маж кој би помислил дека „вредите помалку“ бидејќи сте спиеле со него веднаш.
Многу е важно да го разграничите „сексот за една вечер“ и „сексот на прв состанок“. Овде станува збор за вашата страна од равенката, односно, што барате и што нудите во оваа конкретна ситуација.
За крај, внимавајте да не си направите саботажа на врската, опседнувајќи се со помислата дека сте имале секс на првиот состанок. Освен ако не сте разговарале за тоа и партнерот експлицитно не се изјаснил така, не може да очекувате дека причината зошто по некое време врската не успеала е бидејќи премногу рано сте имале секс.
Затоа, дишете длабоко, користете заштита, бидете безбедни, бидете искрени и водете се според своите желби, а не туѓите очекувања.