Владимир Вајс синоќа распали со пофални зборови за македонскиот капитен, зборувајќи колку е импресиониран од начинот на кој се бори на теренот и покрај неговата возраст.
Словачкиот стратег кој е на чело на репрезентацијата на Грузија синоќа изненади многумина на прес-конференција по натпреварот.
Кога многумина странци посакуваат што побрзо да заврши пресот за да се упатат дома, Вајс одвои време на негова инцијатива да остане подолго. Прашања повеќе немаше, беше слободен да си оди, но тој почна прво заблагодарувајќи се за гостопримството, а потоа се расфрла со пофални зборови за Горан Пандев кој синоќа одигра 90 минути иако ова му беше трет натпревар за само девет дена.
„За Пандев, морам да напоменам колку само е фантастичен играч. На негова возраст како само се бори, како ја гради топката напред... за неговата возраст тој е неверојатен играч. Тој е многу важен за Македонија“, рече Вајс.
Веќе стави дознаење дека за Пандев ќе спрема посебна тактика за натпреварот на 12 ноември, натпревар кој не е во Лигата на нации туку е многу поважен, бараж за пласман на ЕУРО. Ќе се игра во Тбилиси, грузиската престолнина, а победникот, дали по 90, 120 минути или пенал рулет ќе се пласира на ЕУРО за прв пат во својата историја.
„Тој е еден играч, па ќе видиме како ќе се справиме со него. На крајот се надевам дека ние ќе бидеме подобри и ќе го оствариме успехот кој целиот грузиски народ го посакува. Истовремено, ја почитуваме силината на македонската репрезентација, па ќе се видиме во ноември. Уште еднаш ви благодарам“, конечно заврши Вајс, чие излагање ќе го паметат сите.
