Американската тенисерка Серена Вилијамс, која е една од најдобрите во историјата во овој спорт, за првпат по 1997 година нема да има ранкинг на ВТА листата.
За разлика од нејзината сестра Венус, Серена не играше многу тенис пред нејзината 16-та година, а првпат во главниот ждреб влезе на Кремлин купот во ноември 1997 година.
Седум дена подоцна таа настапи на турнирот во Чикаго, каде го покажа целосниот потенцијал и талент па ја победи тогашната седма тенисерка на ВТА листата, Мери Пирс, како и четвртата носителка Моника Селеш, пред да биде елиминирана во полуфиналето од Линдзи Давенпорт. Меѓутоа, тие бодови беа доволни за да ја рангираат Серена Вилијамс меѓу 100-те најдобри тенисерки на светот, а сѐ останато е историја.
Веќе во следната година таа за првпат се најде помеѓу Топ 20 тенисерките во светот, а наредната година стигна до Топ 10 и го освои нејзиниот прв Гренд Слем турнир во Њујорк.
Нејзиното прво појавување на ВТА листата беше на 20 октомври 1997 година, а таа се задржа таму сѐ до вчера. Поради бременоста таа мораше да паузира поголем период и нема заиграно официјален меч откако ја победи нејзината сестра Венус во финалето на Аустралијан Опен тој месец. Сите нејзини бодови беа избришани и таа ја почнува сезоната одново, без товарот на претходните достигнувања.
Серена Вилијамс има освоено 23 Гренд Слем трофеи и тоа ја прави не само една од најдобрите тенисерки, туку и еден од најдобрите спортисти во било кој индивидуален спорт на сите времиња.
Таа се враќа на терените во февруари, и неколкупати досега напомена дека е гладна за уште успеси, па и дека не планира да се пензионира набрзо.