Македонската фудбалска репрезентација со италијански рецепт одиигра против европскиот шампион. Италијанците доминираа, но мрежите мируваа сѐ до крајот кога Трајковски со одличен удар го реши победникот.
Селекторот Благоја Милевски натпреварот го почна со Столе Димитриевски помеѓу стативите, во одбраната лево Езџан Алиоски, десно капитенот Стефан Ристовски, на централните бековски позиции Висар Муслиу и Дарко Велковски, во средината Енис Барди, Аријан Адеми и Бобан Николов, лево крило Александар Трајковски, десно крило Дарко Чурлинов, а во нападот Милан Ристовски.
Првите 45 минути комплетно ѝ припаднаа на домашната репрезентација. „Аѕурите“ доминираа, ја имаа контролата на топката, создадоа и неколку шанси, но бадијала кога резултатот на паузата гласи 0:0.
Првата сериозна шанса дојде по точно половина час игра кога Димитриевски направи лошо додавање, топката ја прими Берарди кој упати удар кон празниот гол, но македонскиот голман стигна навреме и одбрани.
На истекот на истата минута, но во друга акција, Имобиле од лево биеше за малку над голот. Во 39. минута се обиде Инсиње од далечина, но Димитриевски повторно одбрани исфрлајќи во корнер.
Македонија првата шанса ја имаше преку Чурлинов дури во 39. минута кога поита во контра, речиси стигна пред голот на Донарума, но пред да шутира Манчини му ја собра топката. Потоа во последната минута од првиот дел Барди одработи одлична акција, го проигра Трајковски кој упати удар надвор од шестнаесетникот, но беше лесен плен за одличниот Донарума.
Во вториот дел продолжи италијанската доминација, но и борбената игра на „Рисовите“. Јалови беа сите тие напади на момците во сино кон македонскиот гол кога завршницата изостануваше. Само Берарди трипати биеше непрецизно, а нервозниот Манчини на клупата немаше идеја, па на крајот во игра во уфрли дури и едвај опоравениот ветеран, 37-годишниот Џорџо Кјелини.
Казната Италијанците ги стигна во 2. минута од судиското надополнување кога Александар Трајковски од дваесетина метри упати удар кон подалечната статива и го совлада Џиџи Донарума. Трајковски, кој на овој ист стадион играше 4 години во дресот на Палермо, на најубав можен начин се врати во овој убав сицилијански град.
На другиот натпревар од нашата група Португалија со 3:1 ја совлада Турција, што значи дека Македонија од Палермо продолжува за Порто каде во вторник од 20:45 ќе игра натпревар на животот против Кристијано Роналдо и другарите, натпревар за пласман на Мундијалот во Катар.