Неименуван млад холандски тенисер за медиумите во својата татковина изјави дека пред две години дознал за шема за местење тениски натпревари и тоа од својот поранешен партнер со кој се натпреварувал во двојки.
Како што тој тврди, има дури десет професионални играчи кои редовно местат натпревари за да обезбедат дополнителен приход, а четворица од нив се Холанѓани.
„Делев соба со друг тенисер и разговаравме за тоа како успеваме финансиски да ги покриеме трошоците за професионален тенис, кои честопати се многу скапи. Играчите треба сами да платат за сѐ - патувања, сместувања, понекогаш дури и за тренер и за терен за тренинг. Тука се појави темата за местење натпревари - тој играч ми рече дека има друг мобилен телефон, од кој со непознато лице преку пораки известува за тоа кога ќе загуби сет на одреден натпревар во замена за неколку илјади евра. Бев изненаден - во принцип знаев дека тоа постои, често имаше сомневања во некои ситуации, но претпоставував дека тенисерите генерално се 'чисти'“, за NOS изјави неименуваниот холандски тенисер.
„Досега не сакав да го пријавам овој случај - делумно затоа што мојот партнер во двојки беше мој пријател, а делумно затоа што тогаш и јас ќе бев предмет на истрага. Ќе морав да го предадам телефонот и слични работи. Покрај тоа, понекогаш се обложувам на тенис за забава, што може да предизвика проблеми“, продолжи младиот Холанѓанец.
Покрај играчите од Холандија, според анонимниот тенисер во овој механизам за местење се вклучени и играчи од Франција, Шпанија и Белгија.
Судските власти во Холандија велат дека ќе биде покрената постапка, но дека не е шокантно што некои играчи се одлучиле да местат, бидејќи од десетици професионални тенисери во таа земја, само неколкумина можат добро да заработат. По овој повод се јави и Холандската тениска асоцијација и го осуди фактот дека играчи од таа земја учествуваат во вакви недозволени постапки.
Моментално најдобро рангираниот холандски тенисер е Талон Хрикспор, кој е на 118-тото место на АТП листата, но тој не е споменат во врска со овој контроверзен случај.
