За љубителите на метал музиката саботата вечер сите патишта водеа кон Младинскиот културен центар во Скопје каде шведските бендови „Riket“ и „Frantic Amber“, заедно со домашниот „Saidon“, приредија одлична забава.
Требаше да настапи и хрватскиот бенд „Porazium“, но тој настап се откажа откако Хрватите не успеаја да допатуваат поради проблеми на граница. Од „Porazium“ најавија дека ќе надокнадат и наскоро ќе свират во Скопје.
Прв на сцената во салата „25 Мај“ излезе бендот „Riket“ од Стокхолм, формиран во 2016 година. Нивниот дед метал репертоар убаво ја загреа публиката за она што потоа следуваше.
Освен нивните песни, „Riket“ изведоа и кавер трибјут на песната „Psykopat“ од друг шведски бенд, во чест на нивен член кој боледува од неизлечива болест.
По нив на сцената излезе домашниот бенд „Saidon“ од Охрид, кој го промовираше својот нов албум наречен едноставно „Saidon“.
Вечерта ја затворија девојките од „Frantic Amber“, исто така од шведската престолнина Стокхолм. Формиран во 2008 година, овој бенд составен исклучиво од девојки свири мелодичен дед метал.
Настанот беше организиран од Terrorvoid Promotions.
