Со лизгалка му го расече лицето

Хокеарот на Винипег Џетс, Морган Барон, уште долго ќе го памети дуелот против Вегас Голден Најтс откако противничкиот голман со лизгалка му го исече лицето.

Во првата третина имаше типичен хокеарски карамбол пред голот на домашниот тим од Лас Вегас. Настрада Барон кој со лицето налета на испружената нога на паднатиот голман Лоран Бросоа.

Лизгалката му се зари во лицето, по што доби расекотина над окото. Веднаш го напушти мразот и заврши со неколку конци. Сепак, подоцна се врати во игра, а неговиот Винипег победи со 5:1 и поведе со 1:0 во четвртфиналето од плеј-офот на Западната конференција во НХЛ.