Заразата со COVID-19 продолжува да се шири низ светот, а проверена вакцина уште нема.
Шефот на Светската здравствена организација (СЗО), Тедрос Адханом Гебрејесус, вчера предупреди дека „вакцинскиот национализам“ ќе ја продолжи пандемијата на коронавирусот и нагласи дека е од клучно значење сите земји во светот да имаат пристап до вакцини.
Гебрејесус очекува над 500 милиони долари да бидат собрани на Парискиот мировен форум за глобален пристап до вакцините. Целта на прибирање средства е и сиромашните земји исто така да добијат вакцини.
Шефот на СЗО изјави дека вирусот ќе продолжи да се шири доколку посиромашните земји не добијат вакцини против COVID-19, што ќе го одложи економското закрепнување.
Како дел од иницијативата за широко достапни тестови, терапии и вакцини што ја спроведува СЗО, Франција ќе донира 100 милиони евра, Шпанија 50 милиони евра и Европската комисија 100 милиони евра.
Велика Британија се очекува да даде една фунта за секои 4 американски долари дадени од други земји. Фондацијата Бил и Мелинда Гејтс исто така треба да даде значаен придонес.