Норвешкиот скокач Даниел-Андре Танде (27) по денешниот страшен пад беше итно пренесен во болница, каде е ставен во кома, а лекарите дијагностицирале скршеница на вратниот дел од 'рбетот.
Танде се спушташе со брзина од 94 км/час, но за време на слетувањето изгуби контрола над скиите и падна на глава на самиот почеток на слетувањето на Планица и се тркалаше сѐ до целта.
Норвежанецот не се помрдна и беше во несвест, а останатите натпреварувачи во шок не можеа да гледаат што се случува.
*Внимание! Видеото може да Ве вознемири!
Танде моментално е во индуцирана кома за да се намали можното оштетување на мозокот и ќе остане во ваква состојма барем до утре.
„Лекарот ни рече дека повредите не се опасни по живот, нема други повреди на коските освен 'рбетот. Ќе го следиме кога ќе се разбуди“, изјави менаџерот Клас Бреде Братен.
Танде дојде во Планица во финалето на Светскиот куп како 11-ти во генералниот пласман, но сезоната за него заврши на ужасен начин.
Тој со години е еден од најдобрите скокачи, а во 2018 година беше светски шампион.
