Дефанзивецот од редовите на Тотенхем се присетува како порано со големите фудбалски ѕверки можел само да игра на популарната игра „FIFA“.
Џафет Манзамби Танганга е млад 21-годишен дефанзивец кој е надеж за иднината на Тотенхем. Тој е од Конго, но роден е во Англија каде неговите родители имигрирале.
Минатото лето, кога тимот сѐ уште го водеше Маурисио Почетино, Танганга беше вклучен во првиот тим за предсезонските подготовки. Учествуваше во Чемпионс Купот каде настапи и на натпревар против Јувентус во чиј состав се појави и Кристијано Роналдо.
„Тоа беше лудо! Од секоја гледна точка не ми изгледаше реално. Си мислев 'Само што играв со човеков на „FIFA“, а сега играм во вистинскиот живот, играм против еден од великаните'. Тој дефинитивно остава впечаток“, раскажува Танганга за talkSPORT.
Роналдо му даде гол на неговиот тим, но сепак на крајот Тотенхем славеше со 3:2.
Потоа за Танганга следуваше уште еден голем натпревар. Новиот тренер на Спарс, Жозе Мурињо, пред еден викенд го повикал на разговор во пресрет на дуелот со Ливерпул.
„Шефот ме викна два дена пред натпреварот и ми рече 'Сакаш ли да играш викендов?', а бев како 'Па, нормално!'. Иако бев нервозен, нормално дека не можев да речам не, па пред натпреварот го скаутирав Садио Мане на YouTube. Го гледав како ги дрибла противниците и си велев 'Леле, ова може да бидам јас'. Сепак, одиграв добар натпревар на кој не ме посрамоти или нешто слично“.
Танганга минатата сезона настапи на 11 натпревари, како во Премиер лигата, така и во ФА Купот и Лигата на шампиони. Како награда доби продолжување на договорот до 2025 година.
