Со победата од 18 поени разлика над Вашингтон, тимот на Бостон обезбеди место во разигрувањето во НБА, а најзаслужен за победата беше Џејсон Тејтум.
Новововедениот формат на НБА прв го искористи Бостон Селтикс за да обезбеди место во плеј-офот. Откако со 118:100 го совлада Вашингтон Визардс, Бостон експресно дојде во место во разигрувањето за титулата.
Најдобар на паркетот во „ТиДи Гарден“ арената во Бостон беше Џејсон Тејтум кој беше страшно разположен за игра постигнувајќи дури 50 поени во гостинскиот обрач. Добар беше и Кемба Вокер со 29 поени, додека во противничкиот табор Бредли Бил беше најефикасен со 22 поена, а дабл-дабл запиша Расел Вестбрук со 20 поени и 14 скокови.
Бостон сега во плеј-офот на Истокот влегува како седмопласиран и ќе се соочи со второпласираниот Бруклин Нетс.
Вашингтон не е елиминиран, бидејќи правилата на овој таканаречен плеј-ин велат дека согласно неговиот пласман на 8. место го чека поправен против 9-тата Индијана Пејсерс, која, пак, ноќеска го елиминираше 10-тиот Шарлот Хорнетс со 144:117.
На Западот плеј-инот започнува вечерва после полноќ, а се среќаваат Мемфис Гризлис (9) - Сан Антонио Спарс (10) и Лос Анџелес Лејкерс (7) - Голден Стејт Вориорс (8).
