Баерн без премногу драма вчера го победи Хофенхајм со 4:1.
Драмата во клубот од Минхен се случи пред мечот кога клубот го исфрли Корентин Толисо од составот за натпреварот.
Причината за овој потег е новата тетоважа на Толисо.
Управата на клубот била фрапирана од видеото што го објави тату артист (а потоа беше тргнато), на кое се гледа како го тетовира Французинот, а тој не носи заштитна маска.
Со самото тоа што се изложил на опасност од зараза со коронавирус во време на пандемија, Толисо ги прекршил строгите мерки на Бундеслигата за заштита од коронавирус.
„Среќни сме што натпреварите во Бундеслигата може да се играат и покрај ситуацијата, но условот е играчите, тренерите и другите вработени да се придржуваат на здравствените мерки. Толисо ги прекрши, иако клубот јасно им ги стави до знаење на играчите. Тоа нема да се толерира“, се вели во изјавата на извршниот директор на Баерн, Карл-Хајнц Румениге.
Во меѓувреме, Толисо јавно се извини за кршење на протоколот, но извинувањето не го спаси од суспензијата на клубот. Тој ќе плати и парична казна, а клубот ќе го донира износот во добротворни цели.
