Легендарниот фудбалер на Рома вети дека лично ќе му го предаде дресот со бројот 10 на Пауло Дибала доколку аргентинскиот фудбалер дојде во римскиот клуб ова лето.
На Дибала му истече договорот со Јувентус и стана слободен играч, а најсериозни кандидати за неговиот потпис се Интер и Рома.
„Не сме разговарале за тоа, но има уште време. Ќе се обидам да го убедам да дојде во Рим. Би сакал да му го дадам бројот 10 доколку дојде во Рома, но јас не одлучувам“, изјави Франческо Тоти.
Тоти собра 786 настапи во 25 сезони во дресот на првиот тим на Рома, постигна 307 гола и освои 5 трофеи.
Токму Тоти во жолтоцрвениот дрес ја носеше десетката. По неговото пензионирање во 2017 во „пензија“ замина и десетката и оттогаш никој во Рома ја нема носено. Пред Тоти овој број во Рома го носеа играчи како Даниел Фонсека, Луиџи Ди Бјаџо, Андреа Карневале, Џузепе Џанини, Карло Анчелоти, Агостино Ди Бартоломеи, Џанкарло Де Систи, Фабио Капело, Антонио Анџелило, Хуан Скјафино, Еџисто Пандолфини и други.