Товарен воз кој пренесувал земјоделско ѓубриво излетал од шините во американската сојузна држава Ајова, а поради хемиски штетниот товар околното население морало да биде евакуирано. Ова е трета ваква несреќа за неполна недела во Соединетите Американски Држави.
Синоќешната несреќа се случила во 14 часот по локално време пред влезот во гратчето Сибли во северозападниот дел на Ајова, близу границата со Минесота. Нема повредени, меѓутоа дел од градот морал да биде евакуиран бидејќи возот пренесувал товар означен како хемиски опасен. Целата област во радиус од 5 милји е евакуирана.
Возот пренесувал ѓубриво и разни хемикалии кои се употребуваат при неговото производство, како високо испарливиот амониум нитрат. Вагоните биле натруани еден врз друг, некои се запалиле, а огромен облак од црн чад се создал над местото на несреќата.
Од компанијата која управува со возот соопштија дека вкупно 47 вагони се излетани од шините и дека во тек е истрага за несреќата со локалните власти.
За само 24 часа ова е втора железничка несреќа во САД, а трета за една недела. Во саботата товарниот воз на компанијата „Јунион Пасифик“ се преврте во Минесота и предизвика истекување на хлороводородна киселина, а на 11-ти во Илиноис исто така излета товарен воз, за среќа без истекување на штетни материи.