Издавачката куќа „ПНВ Публикации“ од Скопје на 22 и 23 јули во Демир Хисар ќе го реализира и третото издание на проектот „Добри гости“ преку кој иницира серија книжевни гостувања на автори од Скопје во внатрешноста на земјата на заеднички читања со локални автори, а во соработка со локални чинители.
Настанот е во рамки на проектот „Демир Хисар низ боите и звуците на уметноста III“ во организација на Центарот за креативни индустрии – „НЕБО“ од село Суводол, а „Култура бета“ ќе биде медиумски партнер на проектот.
„Добри гости III“ ќе започне на 22 јули во 20 часот во кафе-бар „Конект“ во Демир Хисар на кој ќе настапат дваесетина поети.
Следниот ден, на 23 јули, од 18:00 ч. дел од поетите ќе читаат и во „АРТ ПОИНТ ‒ ГУМНО“, во Слоештица. За време на овој настан академскиот сликар Сергеј Андреевски ќе изведе сликарски перформанс врз основа на прочитаните стихови.
На третото издание на „Добри гости“ ќе учествуват Владимир Мартиновски, Биљана Солунчевска, Марија Велинова, Андреј Ал-Асади, Ѓоко Здравески, Игор Станојоски, Фросина Пармаковска, Перица Сарџоски, Марија Ангеловска, Диме Данов, Антонио Павловски, Зоран Котевски, Кире Огненовски, Стојанче Колевски, Андреј Медиќ Лазаревски и Јулијана Величковска. Дел од нив ќе се претстават со поетско-музички перформанс.
„Добри гости“ се состои од читање поезија и проза, емитување поетски и други краткометражни филмови поврзани со литературата, разговори со автори, со издавачи, разни трибини, книжевни промоции, работилници и слично. Овие гостувања се планира да се одржат во повеќе градови, по што иницијативата ќе заврши кон крајот на 2023 г. со маратонско книжевно читање во Скопје, на кое, доколку се во можност, би учествувале сите вклучени автори.
