Претседателот на Турција, Реџеп Тајип Ердоган денеска ќе присуствува на церемонијата на примопредавање на најголемиот турски воен брод TCG Anadolu, кој од денеска ќе ѝ биде достапен на морнарицата на оваа земја.
Овој брод ќе биде и првиот воен брод на кој ќе може да слетаат беспилотни летала.
TCG Anadolu има капацитет да префрли сили од најмалку еден баталјон во Егејското, Средоземното Море и Црното Море без потреба од домашна поддршка.
Меѓу другото, бродот ќе има систем за оружје, систем за електронско војување, инфрацрвен систем за пребарување и следење, систем за ласерско предупредување и систем за одбрана од торпеда. Сите системи се развиваат преку домашно производство.
Покрај беспилотните летала Bayraktar, турските власти објавија дека во тек се тестовите за слетување и полетување на дронот Kizilelma, како и на моќниот јуришен авион Hurjet развиен од турската компанија Aerospace Industries.
Кога станува збор за големината на воениот брод, медиумите пренесуваат дека бродот е долг 231 метар и широк 32 метри.
„Воениот брод може да носи 94 возила, вклучувајќи 13 тенкови, 27 оклопни јуришни амфибиски возила, шест оклопни транспортери и 15 приколки. Ќе има вкупно 1.223 членови на екипажот, бродот ќе има и опремена болничка установа со две операциони сали“, објаснуваат турските медиуми.
