Ракавиците на легендарниот италијански голман Дино Ѕоф, кои ги носеше на Мундијалот 1982 кога „Аѕурите“ станаа светски шампиони, се украдени од изложба во хотел во Рим.
Парот ракавици беа дизајнирани специјално за светскиот собир во Шпанија, па беа обоени во сива и црна боја со светлоцрвена дланка во знак на почит на локалните бои на доамќинот.
Беа дел од изложба во хотелот „Hilton Rome Airport“ близу аеродромот „Леонардо Да Винчи“ за хуманитарна вечер што ја претставува изложбата „Un Secolo d’Azzurro“, која опфаќа 100 години од историјата на „Аѕурите“.
Ракавиците што ги користеше Ѕоф за време на Светското првенство во 1982 година се во сопственост на Музејот на Калчо во Коверчано, Фиренца.
„Ова е прв пат како сме жртви на ваква сериозна кражба во нашето петгодишно постоење“, рече промотерот на настанот, Алфо Роси Мериги.
Изложбата вклучува над 500 предмети од периодот 1870-2023.
Засега не е познато кој ги украл ракавиците на Ѕоф и зошто токму нив од сите изложени предмети.
Тогаш 40-годишниот Дино Ѕоф беше капитен на Италија кога триумфираше на Мундијалот 1982 година во Шпанија
Ракавиците со логото UhlSport по Мундијалот Ѕоф ги користеше бранејќи за Јувентус.
За среќа не се единствениот пар бидејќи беа произведени неколку, а Музејот на Калчо има и втор примерок.