Очекувано Тотенхем славеше во Скопје, но Шкендија остави добар впечаток зачинет со гол во мрежата на премиерлигашот.
Тренерот на тетовци, Ернест Ѓока, од старт се реши за бункер тактика која се скрши уште во 5. минута кога домашната одбрана заборави на Аргентинецот Ерик Ламела кој беше проигран од Сон Хјон-мин и непречен од никого лесно го совлада Костадин Захов.
Потоа Тотенхем го намали притисокот, а играчите на Шкендија малку се опуштија од почетната трема и почнаа похрабро да играат. Сепак, Англичаните не дозволија ниту една закана по нивниот гол во првиот дел, додека успеаја во неколку наврати да дојдат блиску до втор гол, но недостасуваше завршница.
Несериозноста на гостите од Лондон ја казни Шкендија која на неверување на Жозе Мурињо успеа во 55. минута да израмни со одличниот удар од далечина на Валмир Нафиу кој го остави Џо Харт немоќен.
Тотенхем сепак успеа повторно да поведе кога во 70. минута Сон начека одбиена топка по една одбрана на Захов и без проблеми ја смести во домашната мрежа.
Потоа во 79. минута нововлезениот Хари Кејн успеа со глава да забие во голот на Захов за конечни 1:3 откако Сон одлично му нафрли во казнениот простор.
Шкендија: Захов; Павиќ, Бејтулаи (к), Кривак, Мурати; Дита (77' Зејнулаи), Тотре; Дориев (85' Мерџани), Ахмеди, Нафиу (85' Рамадани); Ибраими.
Тотенхем: Харт; Орје, Санчес, Алдервејрелд (к), Дејвис; Бергвајн (65' Лукас Моура), Винкс (59' Ло Селсо), Ндомбеле; Ламела, Али (60' Кејн), Сон.
Со елиминацијата на Шкендија, Тотенхем продолжува во последното квалификациско коло, односно плеј-офот, каде ќе се бори за пласман во фазата по групи. Таму ќе се сретне со израелскиот Макаби Хаифа кој успеа да слави на гости кај руски Ростов со 1:2.