Македонските ракометари со пораз го почнаа својот седми настап на светските првенства откако со 20:32 загубија од репрезентацијата на Шведска.
Првиот гол за Македонија на Светското првенство беше дело на Мартин Поповски кој, воедно, го постигна и првиот гол на натпреварот.
Во првиот дел се играше гол за гол, но потоа при 9:9 Швеѓаните се одлепија и поведоа и со +5 (9:14) искористувајчи ја играчката предност по исклучувањето на Жарко Пешевски.. Таа предност ја одржуваа до паузата на која се замина со 16:11 за Шведска. Лошо почна нашиот капитен Кирил Лазаров кој ги промаши првите три удари, но потоа реализираше 4.
Нерешлива енигма за нашите ракометари беше левото крило Хампус Ване кој реализираше дури 6 пати во првиот дел, а конечно промаши од пенал кога дебитантот Мартин Томовски итро го одбрани неговиот удар.
Вториот дел Швеѓаните веднаш го почнаа со гол, а Микаел Ајефорс му одбрани пенал на Лазаров, па Шведска поведе и со +8. Победникот веќе беше решен, па до крајот повеќе се играше колку да се доигра натпреварот отколку што имаше некој резултатски императив.
За одбележување е настапот на младиот голман Томовски кој беше пријатно изненадување со 6 одбрани. Најефикасен на натпреварот беше Ване со 11 голови, додека во нашиот табор со 5 беше Лазаров.
Во првиот натпревар од нашата група, со кој синоќа се отвори првенството, домаќинот Египет со 35:29 го совлада Чиле.
Табела по 1. коло:
- Шведска 2 (32:20)
- Египет 2 (35:29)
- Чиле 0 (29:35)
- Македонија 0 (20:32)
Второто коло од оваа Г група се игра в сабота кога од 18 часот Македонија игра против домаќинот, а од 20:30 се среќаваат Чиле и Шведска.