Златан Ибрахимовиќ немал намера да игра за Хрватска или за Босна и Херцеговина од една едноставна причина. Затоа се одлучил за Шведска.
Еден од најдобрите напаѓачи на XXI век, Златан Ибрахимовиќ, одлучи да се повлече од фудбалот и ги изненади сите иако има неполни 42 години. Ибра изјави дека сака нов договор со Милан и уште еден настап за шведската репрезентација на Европското првенство во 2024 година, но медал со репрезентацијата ќе му остане неостварен сон, иако можеби ќе го имаше доколку претходно одлучеше да настапува за земјата од каде што е неговата мајка.
Златан е роден во 1981 година во Шведска во семејство на доселеници од Југославија. Татко му Шефик Ибрахимовиќ е Босанец од Бјелина, додека мајка му Јурка Гравиќ е католик од Хрватска. Иако е горд на своето балканско потекло, Златан Ибрахимовиќ сакаше да игра само за Шведска, и покрај шпекулациите дека го посакуваа и Хрватска и Босна и Херцеговина.
Многу повеќе се зборуваше за хрватската репрезентација бидејќи на почетокот на 2000-тите се појави информација дека тогашниот претседателот на Хрватскиот фудбалски сојуз (ХНС), Влатко Марковиќ, допатувал во Малме за да преговара со Златан за негов настап за „Ватрените“. Не успеал во тоа и долго време постоеше теорија дека тоа е поради тоа што таксистот не можел да го најде домот каде што го чекал таткото Шефик, па им се налутил на Хрватите и поради тоа им рекол „не“. Секако, се покажа дека не е вистина, а години подоцна покојниот Влатко Марковиќ призна дека лажел дека Ибра е блиску до дресот на Хрватска.
„Никогаш, барем кога сме кај нас, не разговаравме со Ибрахимовиќ и не му предложивме да игра за Хрватска. Над 6 илјади млади фудбалери од Босна и Херцеговина поминаа низ нашата служба во ХНС, бидејќи во еден период му помагавме на тој Сојуз. За жал, за Ибрахимовиќ не знаевме ни од БиХ ни од Хрватска, никој не нѐ извести дека има таков голем играч во Шведска, навистина го обожавам, секоја година гласам за него кога се избира најдобар фудбалер. Тој е навистина фантастичен играч“, изјави Марковиќ во една прилика.
Пред натпреварот меѓу Шведска и Хрватска во 2012 година, Златан дефинитивно стави крај на овие обвинувања. „Веќе ме прашаа за тоа... Мајка ми е Хрватка, татко ми е од Босна, но јас сум роден во Шведска и никогаш немав дилема за кого ќе играм. Искрено, мислам дека никој некогаш ми се обратил со прашањето дали ќе играм за Хрватска или за Босна и Херцеговина“.
Познато е дека Златан Ибрахимовиќ има одлични односи со многу фудбалери од Балканот, па со години е пријател со Дејан Станковиќ, имаше одлични односи и со покојниот Синиша Михајловиќ, додека никогаш не криеше дека ова поднебје е причина за неговиот „луд карактер“. „Го носам балканскиот темперамент во мојата глава. Имам семејни врски со оваа поднебје, дома зборуваме 'на нашки'. Го имам овој менталитет и секогаш ќе го носам во себе“, рече еднаш Швеѓанецот.
Останува само да видиме колку Златан ќе преживее без фудбалот кој го игра секој ден од 90-тите, а во својата богата кариера настапуваше за Малме, Ајакс, Јувентус, Интер, Барселона, Милан, ПСЖ, Манчестер Јунајтед и Лос Анџелес Галакси. Кариерата ја заврши со 511 гола на клупско ниво, додека за шведската репрезентација има 122 натпревара и 62 гола.
