Археолози во Данска открија мала кама со рунски симболи стара речиси два милениуми, соопшти музејот, опишувајќи го како значајно откритие во разбирањето на човечката историја на регионот.
Натписот е „уникатен“ и датира од околу 150 година од нашата ера, објави во понеделникот музејот во Одензе.
Руни од овој период досега се откриени само еднаш, во 1865 година во Вимозен, западно од данскиот град Одензе.
„Руните на острицата се напишани со најстарата позната рунска азбука и затоа новото откритие е многу важен дел од разбирањето и толкувањето на најстарата употреба на пишувањето во Данска и во нордискиот регион“, се вели во соопштението на музејот.
Рунското писмо го користеле германските племиња и е најстарата позната форма на пишување во Скандинавија. Било широко користено од почетокот, преку викиншкото доба, до доцниот среден век.
Камата е пронајдена во мала гробница источно од Одензе. На острицата бил изгравиран зборот „хирила“, што на нордиски значи „мал меч“.
Невозможно е да се каже дали тоа е името на самиот нож или неговиот сопственик, велат од музејот.
„Со такво откритие во наши раце, ние како луѓе доживуваме конфронтација со минатото. Рунскиот натпис е како да сме нашле порака од древните луѓе“, рече археологот Јакоб Бонде.
Од 2 февруари, камата ќе биде изложена на специјална изложба во музејот Møntergården во Одензе.
