Најмоќниот Golf повторно се нуди во попрактична каросериска верзија, а „малиот Audi RS6“ под лимот крие сè што носи основата на која е создаден.
Кровни носачи по целата должина на покривот, голем волумен на багажниот простор (од 611 до 1.642 литри), автоматско отворање на петтата врата и повеќе простор за нозете за патниците на задните седишта ја предводат практичната страна што доаѓа со новиот најмоќен Golf во Variant издание.
Она што се крие зад буквата R е исто како и во случајот на стандардниот и најмоќниот Golf од осмата генерација, така што семејно-ориентираниот Golf R се напојува со познатиот 2.0-литарски четирицилиндарски турбо-бензински мотор кој во своето последно издание нуди 320 КС и 420 Nm максимален вртежен момент кој на двете оски (4Motion) се дистрибуира преку 7-брзинскиот автоматски менувач со двојна спојка (DSG).
Со подолгата и попрактична караван верзија, 2022 Volkswagen Golf R Wagon доби малку поголема тежина, па затоа Golf R Variant доцни незабележително во споредба со стандардната верзија кога забрзува од 0 до 100 км/ч, па му се потребни 4,9 секунди наместо 4,7. Максималната брзина во овој случај е 250 км/ч. Со опционалниот пакет R Performance, кој доаѓа со 19-инчни тркала и дополнителна работна програма оптимизирана за Нирбургринг, R Variant достигнува брзина од 270 км/ч.
Почетокот на продажбата е најавен за средината на август, а основната цена во Германија се очекува да биде нешто повеќе од 50.000 евра.
