Aко постои една тема за која се „произведуваат“ песни секој ден, тоа е љубовта. Чувствата кои доаѓаат во пакет со неа: среќа, тага, омраза, разочарување… сите инспирирале стотици илјади љубовни песни за (поранешни) врски.
Фокусот во последно време е на одмазднички песни по раскинување.
Во 2016 година, кога Бијонсе го издаде албумот „Lemonade“, нејзините фанови шекнаа по текстовите посветени на неверството на Џеј Зи. Но, не мора ни да погледнеме толку далеку наназад – љубовните драми на Шакира и Мајли Сајрус добро им се исплатеа на пејачките.
Песната Flowers на Сајрус, наводно инспирирана од неверството на Хемсворт, е оптимистички бран на самољубов по раскинување, а на пејачката ѝ донесе невидени рекорди на слушаност.
Колумбиската дива Шакира се одлучи за пониски удари – во нејзините нови песни ги прозива не само бившиот Пике, туку и неговата нова девојка и несудената свекрва.
Но, ни Мајли, ни Шакира не измислија топла вода. За генерациите наназад тие гласови на женско омоќување беаа Мадона и Аланис Морисет. Легендарниот хит „I will survive“ на Глорија Гејнор од 1978 (чија музика е семплувана за Flowers) можеби е архетипот на ваквото омоќување на жените низ популарната музика.
Додека некои музичарки се фокусираат на гневот, други зборуваат за ослободување и осамостојување и сите овие чувства и реакции се валидни во обидите да се носиме со новонастанатата состојба, со прекинувањето на врската, а потоа и наоѓањето себе си во процесот.
MsMojo направија компилација од „најдобрите оздмазднички песни по раскинување“.
Се чини овие песни ги пееме на глас и кога не сме тазе раскинати и/повредени – едноставно се моќни и повикуваат на солидарно пеење на глас.
Зошто се случува ова?
Љубовта е најсилното чувство (некои психолози велат така, не ние) и кога ќе се измеша со чувства силни како омраза или гнев, можноста да се инспирираме и да ја оставиме душата во песната, се претвора во своевидно ослободување од овие чувства.
Честопати, песните се базираат на приказните на самите пејач(к)и. А, кога се знаат пејачите, се знае нивниот однос и историја, љубопитноста кај луѓето е преголема за да не ја слушнат песната барем еднаш.
Конечно, каде што има одмазда, љубов, разделба - има драма. И, да бидеме искрени, некои од нас сакаат драма!
