Најпознатата хакерска група Anonymous ја хакираше Роскомнадзор, руската федерална агенција одговорна за следење и цензура на медиумите и објави 360.000 датотеки, соопшти групата на Twitter.
Меѓу цензурираните документи објавени од Anonymous, од кои некои датираат од 5 март, се и оние кои покажуваат дека Москва цензурирала сè каде се споменува војната како „руска инвазија“ на Украина.
Роскомнадзор го блокираше пристапот на Русите на Facebook, откако руски написи беа означени како неточни. Органот, исто така, се закани дека ќе ја блокира руската Wikipedia поради вклучувањето на напис за „руската инвазија“, објави Jerusalem Post.
Anonymous пред неколку дена хакираа неколку руски медиуми, прекинувајќи ја нивната содржина и оставија порака дека „нормалните Руси не ја поддржуваат војната“.
„Почитувани граѓани. Ве повикуваме да престанете со ова лудило, не ги праќајте вашите синови и сопрузи во сигурна смрт. Путин нè тера да лажеме и нè загрозува“, се вели во соопштението на руски јазик. „Изолирани сме од остатокот од светот, повеќе не се тргува со нафта и гас. За неколку години ќе живееме како во Северна Кореја“, се вели во соопштението.
Anonymous објавија сајбер војна против Русија на 24 февруари, кога започна инвазијата. Групата е заслужна за хакирање на голем број веб-страници на руската влада. Тие, исто така, отворија веб-страница на која корисниците можат да испраќаат мејлови до случајни Руси чии електронски адреси се зачувани во базата на податоци и ги охрабрија корисниците да ја „шират вистината за војната во Украина“.
