Апасиев се пофали на Фејсбук: Во 2019 имавме 9 донатори, во 2022 – 900

Лидерот на политичката партија Левица, Димитар Апасиев, преку социјалните мрежи се пофали дека десеткратно е зголемен бројот на граѓани кои донирале за партијата во споредба со 2019 година.

Апасиев сподели дека во 2019 година, 9 луѓе донирале за Левица, во 2020 – 200, во 2021 – 400 и во 2022 година 900 луѓе донирале за Левица.

Тој исто така сподели линк до официјалната веб страница на Левица каде е објавено објаснување каде завршуваат донираните пари и кои се условите за донирање.

„Ние сме Партија која не дозволува идеалите и принципите да бидат условени од валканите пари на транзициските богаташи, корумпираните политичари и интересите на разни лоби групи. Во нашата партија се кали новата генерација на Македонија, која стравот и безнадежноста го заменуваат со храброст и решителност во Борбата за подобра иднина. Не е важно колку можеш да одвоиш од себе, важно е да покажеш дека си застанал во борбените редови против непријателите на Татковината, против корумпираната политичка елита. Донирај онолку колку што можеш! Важно е да се обединиме во жедта за правда и воскликот за слобода и со посветеност и ентузијазам повторно да ја воздигнеме Републиката. Најдобите денови се оние кои сѐ уште не сме ги доживеале, а ќе ги создадеме и дочекаме сплотени заедно!“, велат од Левица.

Во врска со условите за донирање, Левица споделуваат:

Согласно Законот за финансирање на политичките партии, вкупниот износ на поединечната донација не смее да ја надмине сумата од 60 просечни нето плати од правни лица и 30 просечни плати од физички лица во Републиката, исплатени во претходниот месец и објавени од Државниот завод за статистика. Овој износ не смее да биде кумулиран повеќе од еднаш годишно.

Политичките партии не можат да се финансираат од:

– влади, меѓународни институции, органи и организации на странски држави и други странски лица;

– државни и локални органи надвор од средствата предвидени со Буџетот на Република Македонија;

– јавни установи, јавни претпријатија, јавни фондови или други правни лица кои располагаат со државен капитал;

– јавни претпријатија, јавни установи и јавни фондови формирани од општините;

– претпријатија кои имаат најмалку 20% учество на државен капитал, јавни установи и институции вклучувајќи ги и тие што го започнале процесот на приватизација;

– приватни претпријатија кои во моментот на давање прилог за политичката партија вршат јавни услуги за државни органи или за јавни установи, претпријатија и фондови по пат на договор;

– здружение на граѓани (невладини организации), верски заедници или религиозни групи;

– средства на претпријатија со мешовит капитал каде што доминантен сопственик е странски вложувач; и

– анонимни или неидентификувани извори.