Аргентинската репрезентација синоќа по изведување пенали ја елиминираше Холандија во четвртфиналето на Мундијалот, а „Гаучосите“ навидум неспортски ја прославија победата.
Кога Лаутаро Мартинес го реализираше решавачкиот пенал за победа, неговите соиграчи истрчаа да го пречекаат, но додека поминуваа покрај несреќните Холанѓани почнаа да им се потсмеваат в лице.
Само неколку фудбалери не обрнаа внимание на противникот, а останатите им се вперија во лицата.
Многумина го осудија однесувањето на Аргентинците кои покажаа непочитување кон противникот, а денеска пристигна објаснување за нивните постапки.
Николас Отаменди, еден од играчите кои најмногу претераа во провоцирањето на Холанѓаните, објасни што се случило.
„Прославивме пред нивните лица затоа што пред секој наш пенал доаѓаше холандски играч и ни кажуваше секакви работи. Фотографијата беше извадена од контекст, но ние славевме само како одговор на тоа“, изјави Отаменди.
И навистина Холанѓаните први се однесуваа неспортски при изведувањето на пеналите и се обидоа да ги деконцентрираат аргентинските фудбалери, што може да се види од видеото кое беше објавено.
Аргентина во полуфиналето ќе се сретне со Хрватска, а интересно е што тоа ќе биде средба на последните два светски вицешампиони.