Анализата на примероците на астероидот Бену понуди нови тези и заклучоци.
![](/sites/default/files/styles/article_image_xxl/public/2024-07/OSIRIS-REx-%D0%91%D0%B5%D0%BD%D1%83.jpg?itok=4O6Q1n_o)
Вселенското летало OSIRIS-REx, кое ѝ припаѓа на американската вселенска агенција НАСА, на 24 септември минатата година направи прелет покрај Земјата и пушти капсула со примероци земени од астероидот Бену. На леталото му требаа 7 години да стигне до астероидот и да ги врати примероците на Земјата, а сега е на пат до астероидот Апофис.
Во меѓувреме, примероците од астероиди понудија значителен увид во еволуцијата на нашиот Сончев Систем. Неодамнешната анализа на примероците сугерира дека вселенската карпа можеби некогаш била дел од примитивниот океански свет.
Првичната анализа на примероците на Бену покажа докази за јаглерод и вода, суштински компоненти за развој на животот на планетата. Сепак, најновите тестови открија дека примероците содржеле и магнезиум натриум фосфат, јонско соединение кое се состои од катјон на магнезиум и анјон на фосфат. Ова откритие ја изненади НАСА, бидејќи далечинските сензори на вселенското летало OSIRIS-REx не го забележаа.
„Постои можност астероидот да се одвоил од одамна исчезнат, мал, примитивен океански свет“, наведе НАСА.
На 20 октомври 2020 година вселенското летало OSIRIS-REx зеде примерок од реголит од кратерот Хокиои на астероидот Бену. Го користел механизмот TAGSAM, кој се состои од механичка рака со глава за земање примероци. Бену беше избран за мисијата затоа што телескопските набљудувања покажаа примитивен, јаглероден состав и минерали што содржат вода.
Астероидите како Бену никогаш не се стопиле или зацврстиле од нивното првобитно формирање. Ова значи дека составот на астероидот Бену може да обезбеди вредни информации за раната еволуција на Сончевиот Систем пред околу 4,5 милијарди години.