Постарите наслови од франшизата „Assassin's Creed“ наскоро ќе добијат свои модернизирани верзии, што значи подобра графика и други подобрувања насочени кон поновите конзоли и помоќните компјутери.
Ив Гијемо, директор на Ubisoft, изјави дека е во тек процесот на преработка на насловот „Assassin's Creed“, што ќе ѝ овозможи на компанијата да работи на постари игрици и да ги модернизира нивните светови. Додаде дека „има светови во постарите игрици на 'Assassin's Creed' кои сè уште се исклучително богати“.
Гијемо исто така рече дека Ubisoft сака „Assassin's Creed“ игриците да излегуваат почесто, но дека целта не е искуството да биде исто секоја година. Претстојната игрица „Assassin's Creed: Codename Hexe“, која се одвива за време на судењата на вештерки во Светата Римска Империја, значително ќе се разликува од игрицата „Assassin's Creed Shadows“. „Shadows“ е сместена во Јапонија на крајот од ерата Сенгоку и прикажува вистински настани и историски личности од тој период, вклучувајќи го и феудалецот Ода Нобунага. Оваа игрица ќе биде достапна од 15 ноември.
Директорот на Ubisoft не откри кои игрици ќе добијат римејк. Списанието Kotaku претходно објави дека се подготвува нова верзија на „Black Flag“, акциона-авантуристичка игрица фокусирана на пиратите од XVIII век. Се појави во 2013 година и стана еден од омилените наслови во франшизата.
Ubisoft ќе претстави и нова платформа Animus hub, која играчите ќе можат да ја користат за да играат игрици од франшизата истиот ден кога ќе се појави „Shadows“.
Animus hub, порано познат како Infinity, потенцијално би можел да стане продавница, што носи нови можности.
