Повеќето авганистански девизни резерви се чуваат на сметки во странство, а народната банка остана без готовина којашто пристигнуваше секои неколку недели, изјави Аџмал Ахмади, избеганиот гувернер на банката.
Народната банка контролира околу 9 милијарди долари од кои седум милијарди во готовина, злато, обврзници и други вложувања кои се чуваат во американската народна банка, наведе Ахмади на Twitter.
Тој беше гувернер на банката до влегувањето на талибанците во Кабул. Вели дека преостанатиот износ се наоѓа на други сметки во странство.
Ова значи дека на талибанците сега им се достапни само околу 0.2% или помалку од вкупните девизни резерви.
„Скоро и да нема готовина и поради запрените приливи дополнително ќе се влоши безбедносната ситуација“, смета Ахмади.
Девизните резерви ниту во еден момент не биле загрозени, ниту пак се украдени пари од која било сметка, нагласи тој. Прогнозира пад на вредноста на авганистанската валута.
„Инфлацијата ќе се зголеми бидејќи во оптек е голема количина пари. Тоа ќе биде на штета на сиромашните бидејќи храната поскапува“, додава Ахмади.
САД нема да го дадат на талибанците имотот на авганистанската влада на располагање, изјави за Reuters неименувано лице вработено во американската администрација.
Талибанците објавија дека државната ризница, државниот имот и слично се во сопственост на државата.
