Руската спасувачка служба потврди нека никој од екипажот на белорускиот карго авион не преживеал во несреќата која се случи денеска во Сибир.
Вкупно седуммина биле во Ан-12 карго авионот кој попладнево се урна во близина на сибирскиот град Иркуцк.
„Во 14:50 часот по московско време авион Антонов Ан-12 кој летал на релација Јакуцк-Иркуцк исчезна од радарот. Прелиминарната истрага покажа дека остатоци од авионот се наоѓаат во атарот на селото Пивовариха, недалеку од аеродромот. Авионот отпочнал второ кружење за време на слетувањето по што исчезнал од радарот“, за РИА Новости изјавија од истражувачката служба.
Противпожарна екипа веднаш се упатила на местото на несреќата бидејќи паднатиот авион бил во пламен. Пожарот бил изгаснат по што се востановило дека сите седуммина се загинати. Авионот бил на белоруската авиокомпанија Гродно.
Белоруското министерство за транспорт објави дека во авионот се наоѓал искусен екипаж од тројца белоруски пилоти. Во него биле уште и двајца Руси и двајца Украинци. Авионот имал поминато во лет вкупно 12.000 часа и при несреќата не превезувал товар.
Антонов Ан-12 е советски турбопропелерски авион произведуван од 1957 до 1973 година, најмногу за потребите на советската армија. Подоцна почнале и цивилни компании да го користат, но како карго авион.
Последна несреќа на ваков тип на авион беше во 2019 година кога Ан-12 се урна во близина на аеродромот во Лвив во Западна Украина, при што загинаа петмина, а тројца беа повредени.
