Бројот на смртни случаи од COVID-19 во Бразил се искачи над 5.000, според најновите податоци што вчера ги објави Министерството за здравство.
CNN објави дека новинарите набрзо по објавувањето на новите податоци го прашале бразилскиот претседател Жаир Болсонаро што мисли за ваквата ситуација.
„Па што? Жал ми е, ама што сакате јас да направам?“, праша Болсонаро.
Тој додаде дека иако неговото средно име е „Месијас“, што во превод значи „месија, човек избран од Бога“, тој сепак не е чудотворец.
„Жал ми е за актуелната ситуација со коронавирусот. Изразувам сочувство на оние кои изгубија блиски. Но, тоа е животот, и мене би можело утре да ми се случи нешто такво“, рече тој пред новинарите.
Болсонаро досега ги отфрлаше тврдењата за пандемијата, а COVID-19 го нарекуваше „грип“. Не ги почитуваше препораките за седење дома што ги воведоа гувернерите и со неговите приврзаници одеше на собири и се гушкаше со луѓе.
