Бројот на пушачи во светот во 2019 година порасна на 1,1 милијарда, од кои третина од вкупниот број отпаѓа на Кина, покажа најновата глобална анализа, пренесе Independent.
Според процената на Global Burden of Disease (GBD), во истата година од последици на пушење починале 7.7 милиони луѓе.
По споредба на податоци од 3.625 студии спроведени во 204 земји, тим на експерти од GBD откри дека 89% од новите пушачи стануваат зависни од цигари пред дваесет и петтата година од животот.
Резултатите од нивните истражувања се објавени во The Lancet и The Lancet Public Health. Научниците ги повикаа земјите да се ангажираат во борбата против уживање на производи од тутун.
Според Емануела Гакиду, главна авторка на студијата, ако поединецот не стане редовен пушач до дваесет и петтата година од животот, многу е мала веројатноста дека ќе остане пушач и понатаму во животот.
Некои земји веќе започнаа да размислуваат за мерки. Така, за да се намали бројот на пушачи во Велика Британија, научниците од UCL во Лондон сметаат дека владата треба да им забрани купување цигари на помлади од 21 година.
Во Велика Британија, од почетокот на пандемијата има 40 проценти повеќе пушачи од претходно. Заклучокот е дека пандемијата го влоши овој глобален проблем.
