За 18 милиони жители на американската сојузна држава Калифорнија издадено е предупредување за можно замрзнување, додека во десетици окрузи е прогласена вонредна состојба поради последиците од серијата брутални зимски невремиња што ја покрија државата со снег, јавува BBC.
Спасувачите работат деноноќно за да ги ископаат заедниците во планинските региони отсечени од длабок снег. Американските медиуми јавуваат дека 80-годишна жена починала откако нејзиниот трем се урнал под тежината на снегот.
Популарниот национален парк Јосемити е затворен до понатамошно известување. „Вработените во паркот работат на обновување на клучните услуги за да им овозможат на посетителите безбедно да се вратат“, се вели во соопштението на Јосемити.
Гувернерот на Калифорнија, Гевин Њусом, доцна синоќа прогласи вонредна состојба во 13 окрузи за да се забрза работата на спасувачите и другите даватели на помош.
„Државата ангажира и приватни компании да го забрзаат расчистувањето на снегот од критичната патна инфраструктура. Во координација со голем број служби, работиме да овозможиме снабдување со електрична енергија онаму каде што е оневозможено поради врнежите“, велат од Кабинетот на Њусом.
Повеќе од 75.000 жители и компании во Калифорнија утрово останаа без струја поради невидените врнежи снег. Во округот Сан Бернардино, источно од Лос Анџелес, снегот се отстранува деноноќно, но ќе биде потребно повеќе од една недела да стигне до некои области, изјави за AP Даун Роу, шеф на локалната канцеларија за контрола на работата.
Некои области беа принудени да се справат со снежните наноси од повеќе од два метри, а властите спроведоа 17 спасувачки операции за да им помогнат на заглавените возачи и скијачи.
Во планините на округот Сан Бернардино, многу жители се заглавени во своите домови поради огромната количина на снег. Округот воспостави телефонска линија за жителите кои се соочуваат со замрзнати цевки, преоптоварени покриви и недостаток на храна.
„Знаеме дека покривите почнуваат да се уриваат поради тежината на снегот“, изјави Роу за AP. Во калифорнискиот град Креслин покривот на продавницата Goodwin and Sons се урнал поради снегот што паѓал и тоа во моментот кога безбедносните инспектори биле на терен.
Службениците го собраа она што можеа да го спасат од продавницата и им го поделија на сиромашните жители. Се предвидува повеќе снег за викендот, вклучувајќи и свежи 60 сантиметри во областа на Националниот парк Јосемити.