Играчите на Интер синоќа со минимални 1:0 ја победија Барселона во дербито на 3. коло од Лигата на шампионите, а каталонскиот стратег Чави Ернандес смета дека неговиот тим бил оштетен за пенал во судиското надополнување.
Усман Дембеле нафрли од десната страна, Дензел Думфрис неспретно реагираше и со десната рака малку ја допре топката која во шестнаесетникот ја нишанеше Ансу Фати, но судијата Славко Винчиќ не се огласи, а и ВАР собата оцени дека контактот е недоволен за пенал.
Тренерот Чави Ернандес беше огорчен од одлуката на словенечкиот судија, а по натпреварот и го обвини Винчиќ за поразот неприфаќајќи дека неговиот тим беше доволно надигран и не успеа речиси 100 минути, со огромното продолжување, да ја скрши одбраната на Интер и да постигне гол од игра.
„Лут сум поради таа ситуација, се работи за неправда. И порано сум велел дека судиите мора да даваат објаснување за своите одлуки. За мене тоа беше чисто играње со рака, а тој мора да ја објасни својата одлука. Бевме подобри, но тоа не беше доволно. Загрижен сум за поразот. Баерн сега има 9 бода, Интер 6, а ние 3“, рече лутиот Чави.
Победничкиот гол за Интер го постигна Хакан Чалханолу во судиското надополнување од првиот дел. Вториот дел суидијата го продолжи дури 8 минути, а отвири крај откако истече уште половина минута плус.
