Балтичките земји и Полска забранија влегување на руски државјани на нивната територија, пренесува dpa.
Сите четири земји (станува збор за Естонија, Латвија, Литванија и Полска) веќе не дозволуваат руски државјани со визи за Шенген за туризам, работа, спорт или култура да влезат преку нивните граници.
Четирите земји дозволуваат исклучоци за оние кои веќе живеат во европските земји, за политички дисиденти и од хуманитарни причини, пренесува dpa. Заедничката одлука на четирите членки на Европската Унија е реакција на руската инвазија на Украина и доаѓа откако тие претежно ги суспендираа визите и престојот за Русите.
Сепак, на руските државјани им беше дозволено да влезат во територијата на овие земји ако имаа визи што ги издаваат некои од преостанатите членови на Шенген, што престанува да важи денеска. Естонската премиерка Каја Калас исто така ги повика другите земји да се приклучат на забраната што останува контроверзна во рамките на пошироката Европска Унија.
„Треба да ги користиме сите достапни алатки за да ја присилиме Русија за да престане со оваа војна“, рече таа во саботата.