Прво откажување откако синоќа селекторот Милевски го објави списокот на повикани играчи за претстојните два последни натпревари од Лигата на нации.
Крилниот офанзивец на Барнли, Дарко Чурлинов, денеска поради повреда го откажа доаѓањето во репрезентацијата.
„Лекарските прегледи потврдија дека напаѓачот не е во можност да му помогне на репрезентативниот тим за претстојните мечеви поради повреда на задниот бутен мускул“, потврди ФФМ.
Селекторот Благоја Милевски синоќа објави список со 27 имиња, кој денеска се намали на 26. Засега не е најавено дали ќе биде повикана замена за Чурлинов.
Македонија на 23 септември игра на гости кај Грузија, додека три дена подоцна дома против Бугарија го затвора овој циклус на Лига на нации на УЕФА.
