Тимот од Северен Лондон веќе остварил контакт со тренерот кому пред 18 месеци му даде отказ за да го донесе Жозе Мурињо.
Во Тотенхем очигледно се пишманаџии. Откако не успеаја да се вратат на победничките патеки под водство на Специјалниот, кому му врачија отказ минатиот месец, сега потрагата по нов стратег ги доведе до познато лице и тоа човекот кој ги водеше 5 и пол години, Аргентинецот Маурисио Почетино.
Директорот на лондонскиот клуб, Даниел Леви, останал во одлични односи со Аргентинецот и покрај отказот кој во ноември 2019 му го врачи. Веќе стапил во контакт со него за да го наговори да се врати во Северен Лондон.
Но, Почетино има договор со ПСЖ кој го презеде скоро, во јануари. Целите во француската престолнина не ги оствари: клубот испадна во полуфиналето од Лигата на шампионите, а титулата во Лиг 1 ја загуби од изненадувањето Лил. Освојувањето на домашните Суперкуп и Куп де Франс не ги правдаат загубените големи натпреварувања.
Засега е нејасен ставот на ПСЖ околу иднината на Почетино. Јасно е дека тимот потфрли, но јасно е и дека Аргентинецот во Париз е неполни 6 месеци.
Почетино е прв пик на Тотенхем, а според англиските медиуми во игра се и предводникот на Ајакс, Ерик тен Хах, потоа поранешниот тренер на Лајпциг, Ралф Рагник, Грем Потер од Брајтон, како и Антонио Конте кој штотуку го напушти Интер и белгискиот селектор Роберто Мартинес. Листата завршува со името на Брендан Роџерс кој седи на клупата на Лестер.
По отпуштањето на Мурињо тимот од Северен Лондон го предводеше Рајан Мејсон, поранешен фудбалер на клубот, кој имаше улога на вршител на должнста. Тешко е за верување дека тој би ја добил довербата да го водил тимот како главен стратег.