Видеото објавено вчера од Евгениј Пригожин, основачот на приватната воена компанија Вагнер, повторно ги разгоре шпекулациите за несогласувања меѓу руските сили кои се борат во Украина.
Основачот на платеничката организација постојано критикуваше високи воени личности, но досега се воздржуваше од директни напади врз рускиот претседател Владимир Путин.
Институтот за проучување на војната (ISW) во својот редовен извештај наведува дека ова сега можеби се променило. Тие тврдат дека Пригожин го искористил Денот на победата за да го „исмева Путин и да го доведе во прашање неговото расудување“. Го спореди со фигура на „среќен дедо“ кој „мисли дека е добар“.
Тој потоа постави реторичко прашање што треба да направат Русија и идните генерации, односно како Русија може да победи ако „дедото“ се покаже како „тотално ѓубре“. Американскиот тинк-тенк додава дека Пригожин, исто така, „забележал дека неименувани лица (најверојатно мислејќи на Путин и високи воени функционери) треба да престанат да се шетаат околу Црвениот плоштад“.
Институтот смета дека Пригожин речиси сигурно мислел на Путин, кој често го нарекуваат „дедо“ или поточно „дедо од бункерот“. Пригожин претходно по име нападна други високи функционери и офицери, но тоа не го стори во случајот на Путин, пренесува Sky News.
ISW истакнува дека нападите на шефот Вагнер врз Путин би можеле дополнително да ја поткопаат нормата за системот на Путин каде поединечни актери можат да се натпреваруваат за позиција и влијание (и да паднат и да ја изгубат наклонетоста на Путин), но не можат директно да го критикуваат Путин. Останува да се види дали Кремљ ќе му одговори на Пригожин во наредните денови.
Некои аналитичари сметаат дека Пригожин ја поставил крајната цел да го собори Путин од позицијата претседател на Русија. Андерс Аслунд, експерт за Русија и поранешен економски советник на руската влада од 1991 до 1994 година, рече дека „би било изненадувачки доколку Пригожин ја преживее оваа изјава“.